COTABATO CITY (November 29, 2025) — Karagdagang 200 pa na mga mahirap, ngayon nag-aaral magmaneho ng tricycle, pampasaherong motorsiklo, jeepney at truck, ang magkakaroon ng libreng mga driving licenses bilang benepisyaryo ng outreach programs ng dalawang kasapi ng regional parliament ng Bangsamoro Autonomous Region in Muslim Mindanao.

Ang naturang mga baguhang mga drivers, ilan sa kanila dating combatants ng Moro Islamic Liberation Front at Moro National Liberation Front, ay hiwalay na tutulungan sa kanilang application for driving licenses ng mga tanggapan ng dalawang regional parliament members, ang physician-ophthalmologist na si Kadil Sinolinding, Jr. at ang abogadong si Naguib Sinarimbo.

Marami sa mga beneficiaries ng mga hiwalay na proyekto ng dalawang regional lawmakers ay mga residente ng Cotabato City, Maguindanao del Sur at Maguindanao del Norte, at ng walong bagong tatag na BARMM municipalities sa Special Geographic Areas sa probinsya ng Cotabato sa Region 12.

Sa ulat nitong Biyernes ng mga himpilan ng radyo sa Cotabato City, ang kabisera BARMM, 100 na mga aplikante ang tutulungan ng outreach team ni Sinarimbo na makakuha ng driving licenses mula sa Bangsamoro Land Transportation Office at 100 din ang tutulungan naman ng tanggapan ni Sinolinding na magkaroon ng libreng lisensya sa pagmamaneho.

Suportado ni BARMM Chief Minister Macacua ang mga naturang mga proyekto ng mga tanggapan ni Sinarimbo at Sinolinding, na siya ring kasalukuyang health minister ng Bangsamoro government.

Tutulong sa pagsusuri ng kanilang physical condition ang mga manggagamot sa Ministry of Health-BARMM sa mga aplikante ng driving licenses upang matiyak kung sila ay physically-fit na maging mga drivers ng mga sasakyang pampubliko.